nasin toki mi li seme? #2
mi wile e seme lon kulupu pi toki pona?
#1) mi wile kama nasa ala e lawa mi kepeken toki pona.
#2) mi wile kama sona e jan pona e jan musi lon kulupu pi toki pona.
#3) mi wile pali e lipu kepeken toki pona e lipu pi ijo pi toki pona.
#4) mi wile kama sona e toki suwi musi ni!!!
toki pona li pona tawa mi tan seme?
#1) ona li lili.
#2) ona li suwi.
#3) ona li musi.
#4) ona li jo e kulupu pona.
#5) ona la mi ken sona e ni: mi sona e seme li sona ala e seme? *1
nimi ni li ike anu pona lili tawa mi:
'lanpan' li nimi pi ike mute tawa mi. ona li jo e kon nimi pi ijo ike kin. 'kama jo' li nimi pi pona mute tan ni: kon nimi ona li ike ala.
'meso' kin li nimi ike tawa mi. ona li sama ni: 'pona ala en ike ala'.
'epiku' en 'kokosila' li pona ala tawa mi. ona li sama mute nimi pi toki ante.
'jasima' en 'leko' en 'misikeke' en 'namako' en 'soko' en 'esun' li ken nimi pona tawa jan. taso pilin mi la mi kepeken lili e ona. ni la ken la mi ken weka e ona.
tenpo ala la mi kepeken e nimi 'oko'. ona li jo e kon pi lili mute taso a! sin la ona li musi ala sama ala kijetesantakalu.
jan ijo li kepeken e nimi 'kipisi e' li kepeken ala e nimi 'tu e' anu 'mute e'. taso mi la 'tu e' en 'mute e' li pona mute tan ni: ona tu li jo e kon mute.
'monsuta' li nimi pona li suwi. taso 'pilin pi awn ala' anu 'pilin ike' li nimi pi pona mute tawa mi. 'monsuta' li ken jo e kon nimi 'musi' lon tenpo sama ni: 'sitelen tawa monsuta li pona tawa mi.' ni li nasa tawa mi. 'pilin ike' la ona li ken ala jo e kon nimi sama ni.
mi kepeken e nimi 'n' lon toki uta, taso ona li nimi pi sama 'a' anu seme?
'alasa' li sama 'kama jo e moku' anu seme?
'luka' en 'noka' li nimi pona. taso mi kepeken e nimi 'loka' la mi ken weka e nimi tu ni.
mi toki e ijo pi toki pona la 'pu' en 'ku' li nimi pona. taso ona li mute li pali kin e nimi. 'nimi ku suli' li seme? nimi ku suli mute li suli ala tawa mi.
nimi ni li pona mute anu musi tawa mi:
'kijetesantakalu' li nimi pi musi nanpa wan. ona li kon pi toki pona a!
'kin' li nimi pona lon toki uta. 'kin' li nimi pi sama ala 'a'. 'tenpo pini a la' li sama mute 'tenpo ni ala' tawa kute. 'tenpo ni kin la' li pona mute tawa kute.
'tonsi' li nimi sin pi pona nanpa wan. ona li pona tawa kulupu pi toki pona kin. jan pona tonsi kin li lon poka mi. mi wile kepeken e nimi ni.
'loka' la jan lili lili lili taso li sona e nimi ni. taso ona li ken pona tan ni: mi ken weka e nimi 'luka' e nimi 'noka'. 'luka' li sama 'loka sewi' anu 'loka jo'. 'noka' li sama 'loka anpa' anu 'loka tawa'. mi pana kin e kon nimi '5*2' tawa nimi 'loka' la ale li pona!
mi pana e nimi tawa toki kepeken nasin seme?
mi kepeken e nimi 'li' tawa 'mi' en 'sina' kin sama ni: 'mi pali li moku'
mi la nimi pi sinpin pi nimi pali li 5: 'kama' en 'ken' en 'lukin' en 'sona' en 'wile'.
mi kepeken ala e 'awen' e 'open' e 'pini' sama nimi pi sinpin pi nimi pali. ona li pana e sona pi ijo ni: pali li awen anu open anu pini? tenpo li suli ala tawa toki pona la awen anu open anu pini kin li suli ala tawa toki pona anu seme?
mi kepeken e 'kepeken' sama nimi pali kin. 'kepeken' li jo e kon nimi tu la ni li pona a. o lukin: 'mi kama kepeken ilo tawa' la mi kama li kepeken e ilo tawa. 'mi kama kepeken e ilo tawa' la mi kama ni: mi kepeken e ilo tawa.
'toki e (ijo)' anu 'toki (pi)' anu 'toki lon' la nanpa wan li pona. nanpa tu anu nanpa mute la jan li ken sona ala e kon toki. o lukin: mi toki e ijo ma / mi toki ma / mi toki lon ma.
mute la mi pana ala sama nimi kule e nimi mute ni: ona li open tan nimi pi sinpin pi nimi ijo. 'sama' taso li ante.
'e' li nimi lili ala li nimi pi sinpin pi nimi ijo tawa mi.
mi kepeken e nimi 'en' lon sinpin taso pi nimi ni: ona li pana e sona ni: ijo seme li pali?
mi sitelen e toki pona lon nasin seme?
sitelen pona li pona mute. sitelen Lasina li pona lili. sitelen pona li suwi kin x)
linja pi sitelen pona la 'sitelen seli kiwen' li pona nanpa wan tawa mi.
sitelen pona la mi wan ala e sitelen tu. tan li tu: nanpa wan la mi ken ala pana pona e sitelen pi kama wan kepeken ilo lipu. nanpa tu la sitelen ale li suli sama lon toki la tan seme la mi wile lili e nimi kule taso?
mi kepeken lili e sitelen lili lon sitelen pona. sitelen ala li sama sitelen lili pi sitelen Lasina.
sitelen Lasina kin la mi kepeken lili e sitelen lili ni: ','. mi kepeken e ona lon tenpo ni: mi wile pana pona e sona tawa jan. o lukin: 'mi kama jo e mani mute la mi ken pana e tomo, tawa sina'
nanpa la mi kepeken e sitelen nanpa Alapi.
toki lili sin:
jan mute li kepeken ala e nimi 'jan mama' li toki e nimi 'mama' taso. ante la mi kepeken e nimi 'jan mama' lon tenpo mute.
mi kepeken ala e nimi 'kin la' tan ni: mi la 'kin' li nimi ijo ala li nimi lili taso.
